వ్యవసాయాన్ని లాభసాటిగా మార్చేదే పొలం పిలుస్తోంది
BSBNEWS - KANDUKUR [25.09.2024]
మండలంలోని విక్కిరాలపేట, కొండి కందుకూరు గ్రామాలలో మండల వ్యవసాయాధికారి వి రాము ఆధ్వర్యంలో పొలం పిలుస్తోంది కార్యక్రమం నిర్వహించారు. ఈ సందర్భంగా వి.రాము మాట్లాడుతూ వ్యవసాయ శాఖ, అనుబంధ శాఖలన్నింటిని ఒకే చోటికి తీసుకొచ్చి వ్యవసాయాన్ని లాభసాటిగా మార్చే కార్యక్రమమే వ్యవసాయ విస్తరణ కార్యక్రమం అని తెలియజేసారు. పి ఎ సి ఎస్ ప్రాథమిక వ్యవసాయ సహకార సంఘాలను బలోపేతం చేసేందుకు రాబోయే రోజుల్లో వీటి ద్వారా గ్రామాలలో ఎరువులను సరఫరా చేస్తారని తెలియజేశారు. పంట వేసిన ప్రతి ఒక్క రైతు తప్పనిసరిగా ఈ పంట ద్వారా పంట నమోదు చేసుకోవాలని కోరారు. కందుకూరు ఉద్యానవన శాఖ అధికారి పి.బ్రహ్మ సాయి మాట్లాడుతూ ఉద్యాన శాఖలో వున్న పథకాలు 50శాతం రాయితీతో యంత్ర పరికరాలు గురించి వివరించారు. 90 శాతం రాయితీతో డ్రిప్, 50శాతం రాయితీ తో స్ప్రింక్లర్ రైతులకు అందుబాటులో ఉన్నాయి అని, కావాలసిన రైతులు సంబధిత రైతు సేవా కేంద్రంలో రిజిస్ట్రేషన్ చేసుకోవాలని కోరారు. పశు వైద్యాధికారి డాక్టర్ బి సుధాకర్ మాట్లాడుతూ కిసాన్ క్రెడిట్ కార్డు ద్వారా పశువుల మేపు ఖర్చుల కోసం దరఖాస్తులు స్వీకరిస్తున్నమని తెలిపారు. అక్టోబర్ ఒకటో తేదీ నుండి గొర్రెలకు మేకలకు ఉచితంగా డీవార్మింగ్ మందులు ఇవ్వబడునని తెలిపారు. ప్రకృతి వ్యవసాయ అధికారి వి సునీత మాట్లాడుతూ 10 నుండి 15 రకాల పప్పుదినుసులు రకాలను ప్రధాన పంటకు ముందు వేసుకొని కలియ దున్నటం వలన భూమిలో సేంద్రియ కార్బనాన్ని స్టిరీకరించవచ్చు అని తెలిపారు. తదుపరి వి.పేట లో ప్రకృతి వ్యవసాయం ద్వారా 15 ఎకరాలలో సాగు చేసిన రైతు యక్కటపల్లి కోటేశ్వరరావు మునగ పంట పొలాలను, అధునాతన టెక్నాలజీతో తయారు చేసిన పిచికారి చేయు బూమ్ స్పేయర్, మునగ ఆకును క్రషింగ్ మిషన్ ద్వారా పొడి తయారీ చేసే విధానాన్ని పరిశీలించడం జరిగినది. ఈ కార్యక్రమంలో వ్యవసాయ మార్కెటింగ్ శాఖ అధికారి షేక్.ఖాసిం, ప్రకృతి వ్యవసాయ అధికారి డిఏంఏం , పి మాధవ సిహెచ్. వెంకట్ రాజా, విక్కిరాలపేట , కొండి కందుకూరు గ్రామాల గ్రామ వ్యవసాయ సహాయకులు వి రోషిణి , కె.చంద్రిక, వి.పేట ఉప సర్పంచ్ బి శ్రీనివాసులు, నరిశెట్టివారిపాలెం సర్పంచ్ ముప్పాళ్ళ శ్రీనివాస రావు, ఉప సర్పంచ్ కె లక్ష్మీ నారాయణ రెండు గ్రామాల పెద్దలు, నాయకులు రైతులు పాల్గొన్నారు.
